قومی پیغام امن کمیٹی کے وفد نے جی ایچ کیو میں ڈی جی آئی ایس پی آر لیفٹیننٹ جنرل احمد شریف چوہدری سے ملاقات کی، جس میں قومی بیانیے کے فروغ اور ریاست دشمن پروپیگنڈے کے خلاف مشترکہ تعاون پر بات چیت ہوئی۔
قومی پیغام امن کمیٹی نے پاک افواج کے ساتھ غیر متزلزل یکجہتی کا اظہار کرتے ہوئے ریاست دشمن بیانیوں اور دہشت گرد عناصر کے خلاف مشترکہ عزم کا اعادہ کیا۔ این پی اے سی نے فتنہ الخوارج اور افغان طالبان کی مذمت کرتے ہوئے کہا کہ ملک میں دہشت گردی کسی صورت قابلِ قبول نہیں اور اس کا کوئی جواز پیش نہیں کیا جا سکتا۔
ڈی جی آئی ایس پی آر نے ملاقات کے دوران کہا کہ قومی سلامتی کے امور میں یکسوئی اور بیانیے پر اتفاقِ رائے وقت کی اہم ضرورت ہے۔ ملاقات میں فتنہ الخوارج/ٹی ٹی پی اور ٹی ٹی اے کے تناظر میں داخلی سلامتی پر جامع گفتگو ہوئی اور مشترکہ موقف مزید مضبوط کیا گیا۔ انہوں نے یہ بھی کہا کہ کشمیر اور غزہ کے حوالے سے پاکستان کا اصولی مؤقف اور مظلوموں کی حمایت اخلاقی ذمہ داری ہے۔
قومی پیغام امن کمیٹی نے اعلان کیا کہ ملک بھر میں منبر و محراب سے اتحادِ امت، سماجی ہم آہنگی اور آئینی برابری کے پیغام کو عام کیا جائے گا۔ ڈی جی آئی ایس پی آر کے مطابق دشمن کی نفسیاتی جنگ کا مقابلہ عوامی شعور اور سچ پر مبنی بیانیے سے ہی ممکن ہے۔
