بنگلادیش کے انقلابی پلیٹ فارم انقلاب منچ کے ترجمان شریف عثمان ہادی کی نمازِ جنازہ ڈھاکا کے مانک میاں ایونیو میں ادا کر دی گئی، جس میں ہزاروں افراد نے شرکت کی۔
غیر ملکی ذرائع ابلاغ کے مطابق شریف عثمان ہادی کی نمازِ جنازہ بنگلادیشی پارلیمنٹ کے باہر ادا کی گئی، جس میں بنگلادیش کے عبوری سربراہ ڈاکٹر محمد یونس بھی شریک ہوئے۔
رپورٹس کے مطابق نمازِ جنازہ میں شریک افراد نے بھارت کے خلاف شدید نعرے بازی کی اور اس بات پر زور دیا کہ بنگلادیش کے اندرونی معاملات میں بھارتی مداخلت مزید برداشت نہیں کی جائے گی۔
واضح رہے کہ آج بنگلادیش میں یومِ سوگ منایا جا رہا ہے، جس کے پیش نظر سیکیورٹی کے سخت انتظامات کیے گئے ہیں۔ یومِ سوگ کا اعلان چیف ایڈوائزر ڈاکٹر محمد یونس نے جمعرات کی شب قوم سے خطاب میں کیا تھا، جس کے بعد کابینہ ڈویژن کی جانب سے باقاعدہ نوٹیفکیشن بھی جاری کر دیا گیا تھا۔
حکام کے مطابق صورتحال پر قریبی نظر رکھی جا رہی ہے تاکہ امن و امان کو یقینی بنایا جا سکے۔
