بالی وڈ کے لیجنڈری اداکار دھرمیندر کی نجی ویڈیو وائرل کرنے والا گرفتار

ممبئی (14 نومبر 2025): بالی وڈ کے لیجنڈری اداکار دھرمیندر کی نجی ویڈیو سوشل میڈیا پلیٹ فارمز پر وائرل کرنے والا اسپتال کا ملازم گرفتار کر لیا گیا۔
انڈین میڈیا کے مطابق ممبئی کے بریچ کینڈی اسپتال کے ملازم کو دھرمیندر اور ان کے اہل خانہ کی نجی ویڈیو وائرل کرنے کے جرم میں گرفتار کیا گیا۔ یہ ویڈیو اُس وقت سامنے آئی تھی جب لیجنڈری اداکار کو اسپتال سے گھر منتقل کیا گیا جس کے بعد مداحوں اور مشہور شخصیات نے شدید غم و غصے کا اظہار کیا۔
ملازم نے نجی ویڈیو اُس وقت خفیہ طور پر ریکارڈ کی جب 89 سالہ دھرمیندر بے ہوشی کی حالت میں بستر پر پڑے تھے اور ان کے اہل خانہ افسردہ دکھائی دیے۔

ویڈیو کے مطابق لیجنڈری اداکار کے بیٹے و مشہور اداکار سنی دیول اور بوبی دیول بھی موقع پر موجود تھے جبکہ پوتے کرن اور راج ویر دیول بھی نظر آئے۔
نجی ویڈیو وائرل ہوتے ہی سوشل میڈیا صارفین نے شدید تنقید کی اور اس حرکت پر غصے کا اظہار کرتے ہوئے مشہور شخصیات کی پرائیویسی کے حوالے سے بحث چھیڑ دی۔
فی الحال اسپتال کے ملازم کو گرفتار کیا گیا تاہم اس حوالے سے مزید کوئی تفصیلات سامنے نہیں آ سکیں۔
واضح رہے کہ گزشتہ روز سنی دیول نے گھر کے باہر جمع پاپرازی (فوٹوگرافرز) پر شدید برہمی کا اظہار کیا تھا جو اہل خانہ کے ہر لمحے کو کیمرے میں قید کرنے کی کوشش کر رہے تھے۔