صدر ڈونلڈ ٹرمپ نے وینزویلا پر فوجی حملے کی منصوبہ بندی پر خاموشی توڑ دی

واشنگٹن (1 نومبر 2025): امریکی صدر ڈونلڈ ٹرمپ نے وینزویلا پر فوجی حملے کی منصوبہ بندی کے بارے میں خاموشی توڑ دی۔
قطری نشریاتی ادارے الجزیرہ کی رپورٹ کے مطابق ڈونلڈ ٹرمپ الزام عائد کرتے ہیں کہ وینزویلا سے منشیات اسمگل کر کے امریکا لائی جاتی ہے۔ پچھلے دنوں امریکی فوج نے کیریبین میں کئی ایسے جہازوں کو نشانہ بنانے کا دعویٰ کیا جو اس کے مطابق منشیات کی اسمگلنگ میں ملوث تھے۔
جمعہ کو ایئر فورس ون میں سفر کے دوران امریکی صدر نے صحافیوں سے گفتگو کی۔ ایک صحافی نے سوال کیا کہ کیا میڈیا رپورٹس درست ہیں کہ امریکا وینزویلا کے اندر حملوں پر غور کر رہا ہے؟ ڈونلڈ ٹرمپ نے جواب دیا: ’نہیں‘ْ۔
دوسری جانب، امریکی وزیر خارجہ مارکو روبیو نے بھی میامی ہیرالڈ کے ایک آرٹیکل کے جواب میں یہی پیغام دیا جس میں کہا گیا تھا کہ امریکی فوج وینزویلا پر حملہ کرنے کیلیے تیار ہے۔
مارکو روبیو نے سوشل میڈیا پلیٹ فارم ایکس پر اس آرٹیکل کے جواب میں لکھا کہ آپ کے ذرائع جو صورتحال کی معلومات رکھنے کا دعویٰ کرتے ہیں یہ آپ کو جعلی کہانی لکھنے پر اکساتے ہیں۔
واضح رہے کہ امریکی صدر نے گزشتہ ہفتے کہا تھا کہ ضروری نہیں کہ وہ جنگ کا اعلان کریں۔ ان کا کہنا تھا کہ میرے خیال میں ہم صرف ان لوگوں کو مار دیں گے جو ہمارے ملک میں منشیات لا رہے ہیں، اب منشیات زمینی راستے سے آ رہی ہیں، اگلا حملہ زمینی ہوگا۔
امریکی فوج نے ستمبر کے شروع سے کیریبین اور مشرقی بحرالکاہل میں کئی جہازوں پر حملے کیے جن میں کم از کم 62 افراد ہلاک اور 14 کشتیاں اور ایک نیم آبدوز تباہ ہوئیں.