این سی سی آئی اے کے ڈپٹی ڈائریکٹرعثمان احمد گرفتار

لاہور : ڈکی بھائی کیس کی تحقیقات کرنے والے این سی سی آئی اے کے ڈپٹی ڈائریکٹرعثمان احمد کو ایف آئی اے لاہور نے گرفتار کرلیا۔
تفصیلات کے مطابق ڈکی بھائی کیس کی تحقیقات کرنے والے لاپتہ این سی سی اے کے ڈپٹی ڈائریکٹر منظر عام پر آگئے، عثمان احمد کو ایف آئی اے لاہور نے گرفتار کرلیا۔
ترجمان نے بتایا کہ کرپشن اور اختیارات کے ناجائز استعمال کے مقدمے میں عثمان احمد کو گرفتار کیا گیا ہے۔
ڈپٹی ڈائریکٹراین سی سی آئی اے عثمان احمد نے لاپتہ ہونے کی وجوہات بھی بتادیں اور کہا ساتھیوں کیخلاف انکوائری چل رہی تھی، انکوائری کے خوف سے چھپ گیا تھا۔
یاد رہے این سی سی آئی اے افسران پر کرپشن کے الزامات پر مقدمہ درج کرایا گیا تھا، مقدمے میں ڈپٹی ڈائریکٹر آپریشن اسلام آباد محمد عثمان اور ڈپٹی ڈائریکٹر ایاز خان سمیت نو افسران کو نامزد کیا گیا ہے۔
ایف آئی آر یوٹیوبر ڈکی بھائی کی اہلیہ اروب جتوئی کی مدعیت میں درج کی گئی، مقدمے میں این سی سی آئی اے افسران کی کرپشن کے انکشافات سامنے آئے تھے۔
اروب جتوئی نے الزام لگایا کہ اسسٹنٹ ڈائریکٹر شعیب ریاض نے 90 لاکھ روپے فرنٹ مینوں کے ذریعے وصول کیے۔ یہ رقم ڈکی بھائی کو مقدمے میں ریلیف دلانے اور جوڈیشل کرانے کے لیے لی گئی تھی اور یہ رقم ایڈیشنل ڈائریکٹر سرفراز چوہدری، ڈپٹی ڈائریکٹر زوار احمد اور دیگر افسران میں تقسیم ہوئی۔