جوڈیشل ایکٹیوزم پینل نے پنجاب میں پتنگ بازی پر مکمل پابندی کے لیے اہم اقدام اٹھا لیا ہے۔ پینل کے سربراہ اظہر صدیق ایڈوکیٹ کی جانب سے وزیراعلیٰ پنجاب، آئی جی پنجاب، چیف سیکرٹری اور دیگر حکام کو مراسلہ بھیجا گیا ہے۔
خط کی کاپی وزیراعظم، صدر اور صوبائی گورنرز کو بھی فراہم کی گئی ہے۔ مراسلے میں موقف اختیار کیا گیا کہ پتنگ بازی پر مکمل پابندی فوری طور پر نافذ کی جائے کیونکہ یہ ایک خونی کھیل ہے اور اس کی کسی صورت اجازت نہیں دی جانی چاہیے۔
مزید براں، خط میں یہ بھی طلب کیا گیا کہ پتنگ بازی میں استعمال ہونے والی خطرناک اشیاء تیار کرنے والوں کے خلاف کیا کارروائی کی گئی، کتنے ملزمان کو گرفتار کیا گیا اور کتنے کو سزائیں دی گئی، اس کی تفصیلات فراہم کی جائیں۔
