اسلام آباد، تہران، استنبول ٹرین چلانے سے متعلق اہم فیصلہ

اسلام آباد، تہران، استنبول فریٹ ٹرین دسمبر 2025 میں دوبارہ چلانے کا فیصلہ کیا گیا ہے۔
تفصیلات کے مطابق وزیر ریلوے حنیف عباسی کی ایرانی وزیر روڈز اینڈ اربن ڈیولپمنٹ سے ملاقات ہوئی جس میں دوطرفہ ریلوے تعاون، فریٹ آپریشنز اور تجارتی روابط پر گفتگو کی گئی۔
حنیف عباسی نے کہا کہ پاکستان اور ایران کے تعلقات میں نمایاں بہتری آئی ہے اور دونوں ممالک نے ریلوے شعبے میں مشترکہ ایکشن پلان پر اتفاق کیا۔
ان کا کہنا تھا کہ وزیراعظم شہبازشریف نے ریلوے اصلاحات کا نیاباب شروع کیا، کراچی پورٹ سے فریٹ ٹرانسپورٹ کے نظام کو مزید مضبوط بنایا جا رہا ہے جب کہ روہڑی سے نوکنڈی 884 کلومیٹر سیکشن پر جلد کام شروع کیا جائے گا۔
کوئٹہ سے تافتان سیکشن کی اپ گریڈیشن آئندہ سال شروع کرنے پر اتفاق کیا گیا۔ فریم ورک آف کوآپریشن کے تحت ریلوے تعاون کو وسعت دینے پر غور کیا گیا، ریلوے آپریشنز اور کمرشل سرگرمیوں میں اشتراک کو مضبوط بنانے پر اتفاق بھی ہوا۔
ملاقات میں چابہار اور گوادر بندرگاہوں کو ریل یا سڑک کے ذریعے جوڑنے پر گفتگو ہوئی اور اسلام آباد، تہران، استنبول فریٹ ٹرین دسمبر 2025 میں دوبارہ چلانے کا فیصلہ کیا گیا۔ اس کے ساتھ ساتھ پاکستان اور ایران میں رابطوں کے فروغ کےلیے کوآرڈی نیشن میکنزم پر اتفاق کیا گیا۔