رہنما نیوز کے مطابق ذرائع الیکشن کمیشن کا کہنا ہے کہ لوکل گورنمنٹ ایکٹ 2022 کے مطابق حلقہ بندیوں پر کام جاری ہے، ہمارے پاس پنجاب کے نئی مقامی حکومتوں کا قانون نہیں پہنچا۔
الیکشن کمیشن ذرائع کا کہنا ہے کہ حلقہ بندیوں پر 31 اکتوبر تک ابتدائی فہرستیں تیار کرلی جائیں گی، شیڈول کے مطابق 8 دسمبر تک حلقہ بندیوں کی حتمی فہرست جاری ہوجائیں گی۔
ذرائع کے مطابق الیکشن کمیشن نے اب تک پنجاب کو حلقہ بندیاں روکنے کی ہدایات جاری نہیں کیں۔ الیکشن کمیشن کا کہنا ہے کہ شیڈول کے مطابق کام جاری ہے۔
واضح رہے کہ پنجاب اسمبلی نے چند روز قبل لوکل گورنمنٹ ایکٹ 2025 منظور کیا تھا، نئے قانون کے مطابق الیکشن کمیشن کو دوبارہ سے فیصلہ کرنا پڑے گا، پی ٹی آئی حکومت نے بھی کئی بار لوکل گورنمنٹ ایکٹ میں ترامیم کی تھیں۔
علاوہ ازیں پنجاب حکومت نے لوکل گورنمنٹ فنانس کمیشن تشکیل دینے کا فیصلہ کر لیا ہے، یہ کمیشن پنجاب لوکل گورنمنٹ ایکٹ کے تحت قائم کیا جائے گا جسے اہم مالیاتی اختیارات حاصل ہوں گے۔
وزیر خزانہ پنجاب کمیشن کے چیئرمین ہوں گے جبکہ وزیر بلدیات کو چیئرمین کی غیر حاضری میں کو چیئرمین کے طور پر اجلاس کی صدارت کا اختیار ہوگا۔
اسپیکر پنجاب اسمبلی کی مشاورت سے چھ ارکان اسمبلی کو کمیشن میں شامل کیا جائے گا۔ محکمہ خزانہ، بلدیات اور پلاننگ اینڈ ڈویلپمنٹ کے سیکرٹریز بھی اس کمیشن کا حصہ ہوں گے۔کمیشن میں مقامی حکومتوں اور مالیات کے چار ماہرین شامل کیے جائیں گے جن میں کم از کم ایک خاتون کی شمولیت لازمی قرار دی گئی ہے۔
