حماس کے پاس غزہ امن منصوبے پر جواب دینے کیلئے 3 سے 4 دن ہیں، ٹرمپ

غیرملکی میڈیا رپورٹس کے مطابق صدر ٹرمپ نے کہا کہ اسرائیلی اور عرب رہنما منصوبے کو تسلیم کرچکے ہیں، معاہدے پر اب صرف حماس کے جواب کا انتظار ہے، معاہدے سے متعلق حماس کے جواب کے منتظر ہیں بصورت دیگر بہت افسوسناک انجام ہوگا۔
امریکی صدر ڈونلڈ ٹرمپ کا معاہدے کے سلسلے میں زور دیتے ہوئے مزید کہنا تھا کہ امن منصوبے پر مزید مذاکرات کا کوئی امکان نہیں ہے۔
یہ بات اہمیت کی حامل ہے کہ مریکی صدر ٹرمپ کے غزہ جنگ بندی منصوبے کو اسرائیلی وزیراعظم نیتن یاہو نے قبول کرلیا، تاہم انھوں نے کہا کہ ناکامی کی صورت میں اسرائیل اپنی شرائط لاگو کرے گا۔
وائٹ ہاؤس میں صدر ٹرمپ کے ہمراہ مشترکہ نیوز کانفرنس میں اسرائیلی وزیراعظم نیتن یاہو کا کہنا تھا کہ غزہ جنگ ختم کرنے کے صدر ٹرمپ کے منصوبے کی مکمل حمایت کا اعلان کرتا ہوں۔
اسرائیلی وزیراعظم نے کہا کہ جنگ بندی معاہدے کے مطابق پہلا قدم غزہ سے محدود انخلا ہوگا، جس کے بعد 72 گھنٹے میں تمام اسرائیلی قیدیوں کی رہائی ہوگی۔
نیتن یاہو کا کہنا تھا کہ اگلا مرحلہ حماس کو مکمل غیرمسلح کرنے کیلئےانٹرنیشنل باڈی کا قیام ہوگا، انٹرنیشنل باڈی کامیاب رہی تو جنگ ہمیشہ کے لیے ختم ہوجائے گی۔
اسرائیلی وزیراعظم نے مزید کہا کہ اسرائیل حماس کے غیرمسلح ہونے کے مطابق انخلا کرے گا، نیتن یاہو نے پریس کانفرنس میں حماس کو دھمکی دی کہ حماس منصوبہ مسترد کرے تو اسرائیل اپنا کام مکمل کرے گا۔
حماس منصوبہ قبول کرکے پھر پیچھے ہٹی تو اسرائیل تنہا ہی معاملہ حل کریگا، حماس کے پاس آپشن محدود ہیں منصوبہ قبول کرے تو جنگ ختم ہوسکتی ہے، منصوبے کی ناکامی کی صورت میں اسرائیل اپنی شرائط لاگو کرے گا