خیبرپختونخوا میں غیر قانونی کان کنی پر پابندی عائد

کرک : خیبرپختونخوا میں غیر قانونی کان کنی پر پابندی عائد کردی گئی اور کہا گیا سونے کی تلاش اور نکالنے پر بھی مکمل پابندی عائد ہوگی۔
تفصیلات کے مطابق خیبرپختونخوا حکومت نے ضلع کرک میں غیر قانونی کان کنی پر 60 روز کے لیے پابندی عائد کر دی ہے۔
محکمہ داخلہ کی جانب سے اعلامیے میں کہا گیا کہ ضلع بھر میں دفعہ 144 نافذ کر دی گئی ہے، جس کے تحت کسی فرد یا ادارے کو کان کنی کی اجازت نہیں ہوگی۔
اعلامیے میں کہنا تھا کہ سونے کی تلاش اور نکالنے پر بھی مکمل پابندی عائد ہوگی، پابندی کا مقصد عوام کے جان و مال کا تحفظ اور ماحولیاتی نظام کو غیر قانونی سرگرمیوں سے بچانا ہے۔
محکمہ داخلہ نے کہا کہ غیر قانونی کان کنی سے نہ صرف ماحولیاتی نظام متاثر ہوتا ہے بلکہ امن و امان کو بھی خطرات لاحق ہوتے ہیں، جبکہ اس اقدام کا مقصد اسمگلنگ کی روک تھام بھی ہے۔
اعلامیے میں مزید کہا گیا ہے کہ خلاف ورزی کی صورت میں مشینری اور گاڑیاں ضبط کر لی جائیں گی اور ذمہ داروں کے خلاف دفعہ 188 کے تحت کارروائی ہوگی۔ خلاف ورزی کرنے والوں کو جرمانہ، قید یا دونوں سزائیں دی جا سکیں گی۔