گھریلو آر ایل این جی کنکشن کے لیے آن لائن درخواستوں کا نظام جاری

اسلام آباد: گھریلو آر ایل این جی کنکشن کے حصول کے لئے صارفین سوئی کمپنیز کی سرکاری ویب سائٹس ،موبائل ایپ سےآن لائن درخواست دے سکیں گے۔
تفصیلات کے مطابق گھریلو صارفین کو آر ایل این جی کنکشن کی فراہمی سے متعلق جائزہ اجلاس وزیر پیٹرولیم علی پرویز ملک کی زیر صدارت منعقد ہوا۔ اجلاس میں وزیر پیٹرولیم نے آر ایل این جی کنکشنز فراہم کرنے کے جامع روڈ میپ کا تفصیلی جائزہ لیا۔
ایم ڈی سوئی کمپنیز نے بریفنگ میں بتایا کہ پہلے سال کے دوران نئے آر ایل این جی کنکشنز فراہم کرنے کا بڑا ہدف مقرر کیا جائے گا۔ وزیر پیٹرولیم نے ہدایت دی کہ عوامی سہولت کے لیے ایک مضبوط اور صارف دوست میکانزم تشکیل دیا جائے تاکہ درخواست دینے اور کنکشن حاصل کرنے کے عمل کو آسان بنایا جا سکے۔
وزیر پیٹرولیم کا کہنا تھا کہ یہ اقدام وزیراعظم کے سستی توانائی کے عوامی مطالبے کو پورا کرنے کے لیے حکومت کی اولین ترجیح ہے، ایل پی جی کے مقابلے میں آر ایل این جی 30 فیصد سستی اور گھریلو استعمال کے لیے زیادہ محفوظ ایندھن ہے۔
اعلامیے میں کہا گیا کہ صارفین سوئی کمپنیز کی سرکاری ویب سائٹس اور موبائل ایپ کے ذریعے آن لائن درخواست دے سکیں گے جبکہ مقامی دفاتر میں بھی درخواستیں جمع کرائی جا سکیں گی۔
وزیر پیٹرولیم نے دونوں سوئی کمپنیوں میں پراجیکٹ مینجمنٹ آفس قائم کرنے کی ہدایت کی، جو درخواست جمع ہونے سے لے کر کنکشن فراہمی تک تمام مراحل کی نگرانی کے ذمہ دار ہوں گے۔
علی پرویز ملک نے زور دیا کہ عوام کی کسی بھی شکایت کا فوری تدارک کیا جائے تاکہ سہولت کی فراہمی میں شفافیت اور تیزی یقینی بنائی جا سکے۔