’پاکستان ٹیم ایشیا کپ جیتنے کی پوری صلاحیت رکھتی ہے‘

متحدہ عرب امارات میں ہائبرڈ ماڈل کے تحت ایشیا کپ ٹی 20 فارمیٹ میں جاری ہے۔ پاکستان ٹیم آج اپنی مہم کا آغاز عمان کے خلاف میچ سے کرے گی۔ میگا ایونٹ سے قبل ٹرائی نیشن سیریز جیتنے پر قومی ٹیم اور کھلاڑیوں کے حوصلے بلند ہیں۔
پاکستان کرکٹ ٹیم کے سابق کپتان سوئنگ کے سلطان وسیم اکرم نے گرین شرٹس کو ایشیا کپ جیتنے کے لیے فیورٹ ٹیم قرار دیا ہے۔
وسیم اکرم نے میڈیا سےگفتگو کرتے ہوئے کہا ہے کہ پاکستان ٹیم ایشیا کپ جیتنے کی بھرپور صلاحیت رکھتی ہے۔ قومی ٹیم ٹرائی نیشن سیریز جیت کر آ رہی ہے اور کھلاڑیوں کا مورال ہائی ہے۔
سابق پیسر نے کہا کہ گرین شرٹس ایشیا کپ میں کسی بھی ٹیم کے خلاف جیت سکتے ہیں۔ پاکستانی کھلاڑیوں کو صرف خود پر بھروسہ کرنا ہوگا۔
سوئنگ کے سلطان نے مزید کہا کہ یہ ہماری ٹیم ہے اور بحیثیت قوم ہمیں نتیجہ فوری چاہیے ہوتا ہے۔ ہمیں انہیں وقت اور اعتماد دینا ہوگا۔
ایشیا کپ میں روایتی حریفوں پاکستان اور بھارت کے درمیان مقابلہ اتوار 14 دسمبر کو شیڈول ہے۔ تاہم میچ سے قبل ہندو انتہا پسند اس میچ کو سبوتاژ کرنے کی کوششوں میں مصروف ہیں۔
صرف ہندو انتہا پسند ہی نہیں کئی سابق بھارتی کھلاڑی بھی اپنی ٹیم کے پاکستان سے میچ کھیلنے حتیٰ کے ایشیا کپ میں شرکت کی مخالفت کرتے آئے ہیں۔
گزشتہ روز سابق بھارتی آل راؤنڈر روی چندرن ایشون نے بڑھکیں مارتے ہوئے انڈیا کو ٹورنامنٹ میں پیشگی ناقابل شکست قرار دیا۔ ان کے اس متکبرانہ انداز بیان کا باسط علی نے کرارا جواب دے دیا