اسلام آباد: پاکستان میں آن لائن خریداری کے دوران مصنوعی ذہانت کے استعمال میں نمایاں اضافہ دیکھنے میں آیا ہے۔ ایک نئی تحقیق کے مطابق 82 فیصد پاکستانی صارفین خریداری میں مدد کے لیے اے آئی ٹولز استعمال کر چکے ہیں۔
ویک فیلڈ ریسرچ کی جانب سے ویزا کے لیے تیار کی گئی ’’اسٹے سیکیور اسٹڈی 2025‘‘ میں انکشاف کیا گیا ہے کہ پاکستانی صارفین تیزی سے مصنوعی ذہانت کی جانب راغب ہو رہے ہیں، کیونکہ ان کے نزدیک اے آئی نے آن لائن شاپنگ کو زیادہ تیز، آسان اور مؤثر بنا دیا ہے۔
ویزا کی سالانہ ’’Stay Secure‘‘ رپورٹ کے مطابق صارفین مختلف مقاصد کے لیے اے آئی ٹولز استعمال کر رہے ہیں۔ تحقیق میں بتایا گیا کہ 56 فیصد صارفین قیمتوں کا موازنہ کرنے، 53 فیصد مصنوعات کے ریویوز اور ریٹنگز جانچنے جبکہ 47 فیصد تحائف سے متعلق آئیڈیاز حاصل کرنے کے لیے اے آئی کا سہارا لیتے ہیں۔
رپورٹ کے مطابق ڈیجیٹل تجارت اور آن لائن خریداری کے بڑھتے رجحان کے ساتھ صارفین جدید ٹیکنالوجی سے فائدہ اٹھا رہے ہیں، جس سے خریداری کے فیصلے زیادہ آسان اور معلوماتی ہو گئے ہیں۔
ماہرین کا کہنا ہے کہ آنے والے برسوں میں اے آئی پر مبنی شاپنگ اسسٹنٹس اور سفارشاتی نظام آن لائن خریداری کے تجربے کو مزید بہتر بنائیں گے۔
