کراچی میں ممکنہ بارشیں : کے الیکٹرک کی شہریوں کو اہم ہدایات

کراچی میں ممکنہ موسلادھار بارشوں کے پیش نظر کے الیکٹرک نے شہریوں کو احتیاطی تدابیر اختیار کرنے کی ہدایت کرتے ہوئے خصوصی ایپ استعمال کرنے کا مشورہ دیا ہے۔
اس حوالے سے کے الیکٹرک کے ترجمان عمران رانا نے مون سون بارشوں اور شہر میں بجلی کی فراہمی کی صورتحال پر ایک بیان جاری کیا ہے۔
بیان میں کہا گیا ہے کہ بھارت سے آنے والا مون سون اسپیل سندھ میں بارش برساتا ہوا کراچی پہنچ گیا ہے، مون سون اسپیل کی وجہ سے شہر کے مضافات اور مرکزی علاقوں میں ہلکی اور تیز بارش کی اطلاعات ہیں۔
عمران رانا نے بتایا کہ کے الیکٹرک دیگر شہری اداروں کے ساتھ ہائی الرٹ پر ہے، مختلف علاقوں میں بارش کے باوجود شہر میں بجلی کی فراہمی کی صورتحال معمول کے مطابق ہے۔
ان کا کہنا ہے کہ ہمارے 2100 سے زائد فیڈرز میں سے بارش سے صرف 60 سے کم فیڈرز متاثر ہوئے، شہر کے نشیبی علاقوں، کنڈے اور بجلی چوری والے فیڈرز کو حفاظتی نقطہ نظر سے بند کرنا پڑا ہے۔
 انتظامیہ کسی بھی ناخوشگوار صورتحال س بروقت نمٹنے کیلیے مرکزی کنٹرول روم کے ذریعے شہر میں بجلی کی فراہمی پر مسلسل نظر رکھے ہوئے ہے۔
عمران رانا نے شہریوں کو ہدایت دی کہ انفرادی شکایات کے لئے کے الیکٹرک کے سوشل میڈیا پلیٹ فارم اور کے ای لائیو ایپ کا استعمال کریں۔
کے الیکٹرک کے لئے انسانی جان کی حفاظت سب سے اہم ہے، کے الیکٹرک سوشل میڈیا اور کےای لائیو ایپ کے ذریعے حفاظتی اقدامات کے پیغام نشر کررہی ہے۔
انہوں نے کہا کہ اگر کوئی بھی بجلی کی تار ٹوٹی ہوئی دیکھیں تو اس کی اطلاع 118 پر ضرور دیں، ننگے پاؤں گیلے ہاتھوں سے بجلی کے آلات نہ چھوئیں، بچوں کو بھی ان آلات سے دور رکھیں۔
کے الیکٹرک کی تنصیبات کے علاوہ اسٹریٹ لائٹ کے کھمبوں، انٹرنیٹ لیبلز ٹریفک سگنلز بھی بجلی کا استعمال کرتے ہیں۔
شہر کے اسپتالوں اور ایمرجنسی سروسز کو بحال رکھنے کے لئے اسٹریٹجک فیڈرز کی بحالی ترجیح ہے