اسلام آباد: پاکستان تحریک انصاف نے کارکنان سے بانی پی ٹی آئی عمران خان کی اسپتال منتقلی کے موقع پر اسپتال کے باہر جمع نہ ہونے کی اپیل کردی۔ پارٹی کے مطابق عمران خان کی صحت اور علاج کے مفاد میں اسپتال کے باہر پُرامن ماحول برقرار رکھا جائے اور سپریم کورٹ کے احکامات پر عملدرآمد میں تعاون کیا جائے۔
پی ٹی آئی نے مطالبہ کیا ہے کہ عمران خان کو فوری طور پر شفا انٹرنیشنل منتقل کیا جائے اور ماہر ڈاکٹرز پر مشتمل میڈیکل بورڈ تشکیل دیا جائے، جس میں آنکھ، دل اور دیگر امراض کے ماہرین شامل ہوں۔ پارٹی نے ڈاکٹر فیصل سلطان اور ڈاکٹر عظمیٰ خان کو بھی میڈیکل بورڈ میں شامل کرنے کا مطالبہ کیا ہے۔
پی ٹی آئی نے بانی پی ٹی آئی کی اہل خانہ سے ملاقات یقینی بنانے اور ان کے قانونی و انسانی حقوق کے تحفظ پر بھی زور دیتے ہوئے سپریم کورٹ کے فیصلے کا خیرمقدم کیا ہے۔
