واشنگٹن: امریکی صدر ڈونلڈ ٹرمپ نے کہا ہے کہ ایران کے ساتھ طے پانے والی یادداشتِ مفاہمت ابھی حتمی نہیں ہوئی، اور اگر مجوزہ معاہدہ ان کی توقعات کے مطابق نہ ہوا تو امریکا دوبارہ فوجی کارروائی کر سکتا ہے۔
مصری صدر عبدالفتاح السیسی سے ملاقات کے بعد میڈیا سے گفتگو کرتے ہوئے ڈونلڈ ٹرمپ نے دعویٰ کیا کہ ایران کے خلاف ناکہ بندی انتہائی کامیاب رہی۔ ان کے مطابق ایران کی بحری، فضائی اور عسکری صلاحیتوں کو شدید نقصان پہنچا جبکہ دفاعی نظام، میزائل اور ریڈار سسٹمز بھی تباہ کر دیے گئے۔
امریکی صدر نے کہا کہ ایران کے ساتھ ایک پائیدار معاہدے پر پیش رفت ہوئی ہے اور معاہدہ مکمل ہونے کے بعد آبنائے ہرمز مکمل طور پر کھل جائے گی، جس سے عالمی تیل کی ترسیل میں بہتری اور قیمتوں میں مزید کمی متوقع ہے۔
انہوں نے مزید کہا کہ ایران کے ساتھ مجوزہ ڈیل کے حوالے سے آج ایک اہم پریس کانفرنس کی جائے گی۔ ٹرمپ کے مطابق امریکا ایران میں کوئی سرمایہ کاری نہیں کرے گا اور ایران کو کسی صورت جوہری ہتھیار رکھنے کی اجازت نہیں دی جائے گی۔
ڈونلڈ ٹرمپ نے ایک بار پھر واضح کیا کہ ایران کے ساتھ یادداشتِ مفاہمت ابھی حتمی شکل اختیار نہیں کر سکی اور اگر مجوزہ معاہدہ قابل قبول نہ ہوا تو امریکا دوبارہ فوجی کارروائی کا راستہ اختیار کر سکتا ہے۔
