نائیجیریا کی ریاست اونڈو میں فوجی طیارہ حادثے کا شکار ہوگیا، جس کے نتیجے میں طیارے میں سوار تمام 32 افراد جاں بحق ہوگئے۔
غیر ملکی خبر ایجنسی کے مطابق طیارے میں 25 مسافر اور عملے کے 7 ارکان سوار تھے۔ طیارہ گزشتہ روز بینن شہر سے لاگوس جاتے ہوئے حادثے کا شکار ہوا۔
حکام کے مطابق حادثے کی وجوہات جاننے کے لیے تحقیقات جاری ہیں، جبکہ واقعے سے متعلق مزید تفصیلات سامنے آنے کا انتظار ہے۔
نائیجیریا کے صدر بولا احمد تینوبو نے طیارہ حادثے پر گہرے دکھ اور افسوس کا اظہار کیا ہے۔ اپنے بیان میں انہوں نے کہا کہ یہ حادثہ نائیجیریا کی مسلح افواج اور پوری قوم کے لیے ایک انتہائی تکلیف دہ لمحہ ہے۔
صدر تینوبو نے کہا کہ نائیجیریا کی فضائیہ کے اہلکار ملک کے تحفظ کے لیے روزانہ اپنی جانیں خطرے میں ڈالتے ہیں، ان کی قربانیوں کو کبھی فراموش نہیں کیا جائے گا۔
