کراچی: نوجوان تاجر میر رضا قتل کیس کی تحقیقات تاحال جاری ہیں تاہم اب تک کوئی اہم پیشرفت سامنے نہیں آسکی۔ تفتیشی ذرائع کے مطابق رات گئے تحقیقاتی کمیٹی کا فیروزآباد تھانے میں اجلاس ہوا، جس کے بعد کمیٹی نے جائے وقوعہ کا دورہ کیا۔
ذرائع کے مطابق ابتدائی تفتیش میں سامنے آیا ہے کہ میر رضا 28 جولائی کی رات 3 سے 4 بجے کے درمیان لاپتا ہوا۔ تحقیقاتی کمیٹی نے اسی دورانیے کو مدنظر رکھتے ہوئے جائے وقوعہ پر فائرنگ کا تجربہ کیا تاکہ اطراف کی آبادیوں تک فائر کی آواز پہنچنے کا اندازہ لگایا جاسکے۔
جائے وقوعہ کے قریب مسجد، نرسری اور دیگر مقامات پر موجود افراد سے بھی پوچھ گچھ کی گئی، تاہم کسی شخص نے فائرنگ کی آواز سننے کی تصدیق نہیں کی۔
تفتیشی ذرائع کے مطابق 28 جولائی کو اسی مقام پر فائرنگ ہوئی تھی یا نہیں، اس حوالے سے تحقیقات جاری ہیں۔ میر رضا کی دونوں ہتھیلیوں پر گن پاؤڈر کے شواہد بھی ملے ہیں، جس کے بعد یہ پہلو بھی زیرِ تفتیش ہے کہ آیا میر رضا نے خود فائرنگ کی تھی یا نہیں۔
