ملک میں پیٹرولیم مصنوعات کی قیمتوں کے تعین کے طریقہ کار پر تنازع شدت اختیار کر گیا ہے، جہاں پیٹرول پمپ اونرز ایسوسی ایشن نے حکومت کے موجودہ نظام پر شدید تحفظات کا اظہار کیا ہے۔ ایسوسی ایشن نے وزیرِ پیٹرولیم کو خط لکھ کر مطالبہ کیا ہے کہ قیمتوں کے تعین کے عمل میں انہیں اعتماد میں لیا جائے۔
وائس چیئرمین نعمان بٹ کے مطابق ملک بھر کے تقریباً 15 ہزار پیٹرول پمپ مالکان موجودہ طریقہ کار سے نالاں ہیں اور اسے غیر مؤثر قرار دے رہے ہیں۔ خط میں کہا گیا ہے کہ موجودہ حالات میں ایسا کوئی قدم نہ اٹھایا جائے جو مزید بحران کو جنم دے۔
ایسوسی ایشن نے خبردار کیا ہے کہ اگر ان کے مطالبات تسلیم نہ کیے گئے تو ملک بھر میں پیٹرول پمپس بند کیے جا سکتے ہیں، جس سے سنگین صورتحال پیدا ہونے کا خدشہ ہے۔ انہوں نے واضح کیا کہ ایسی کسی بھی صورتحال کی ذمہ داری وزیرِ پیٹرولیم پر عائد ہوگی۔
