سندھ کے مختلف شہروں میں آنے والے شدید مٹی کے طوفان اور تیز ہواؤں نے بڑے پیمانے پر نقصان پہنچایا۔ اگرچہ موسم کی شدت میں کمی آئی، تاہم متعدد علاقوں میں سولر پلیٹیں اکھڑ گئیں، گھروں کی چھتوں کو نقصان پہنچا اور بجلی و مواصلاتی نظام متاثر ہوا۔
سکھر اور گردونواح میں گرد آلود طوفان اور بارش کے باعث حدِ نگاہ کم ہو گئی، جبکہ سیپکو ریجن کے 60 سے زائد فیڈرز ٹرپ ہونے سے وسیع علاقے بجلی سے محروم ہو گئے۔ کشمور اور کندھ کوٹ میں بھی تیز ہواؤں نے شہریوں کی املاک کو نقصان پہنچایا اور کئی گھروں کی چھتیں متاثر ہوئیں۔
دوسری جانب جنوبی پنجاب کے علاقے علی پور کے مختلف دیہات میں آندھی کے دوران اچانک آگ بھڑک اٹھی، جس نے بستی بگٹی میں 40 سے زائد گھروں کو اپنی لپیٹ میں لے کر خاکستر کر دیا۔ واقعے میں خواتین اور بچوں سمیت 10 افراد جھلس گئے، جنہیں طبی امداد کے لیے اسپتال منتقل کر دیا گیا ہے۔
