لاہور: سانحہ کاہنہ سے متعلق ابتدائی تحقیقاتی رپورٹ وزیراعلیٰ پنجاب مریم نواز کو ارسال کر دی گئی ہے۔
ذرائع کے مطابق رپورٹ میں بتایا گیا ہے کہ چھت پر اضافی مٹی ڈالنے کے باعث ٹی آئرن اور گارڈر پر دباؤ بڑھا، جس کے نتیجے میں چھت گر گئی۔ رپورٹ میں یہ بھی کہا گیا ہے کہ کمزور ڈھانچے نے اضافی بوجھ برداشت نہیں کیا، جبکہ حادثے کے وقت ٹیچر اور 20 بچے عمارت کے اندر موجود تھے۔
رپورٹ کے مطابق بچوں کی اموات سر پر شدید چوٹیں لگنے کے باعث ہوئیں۔ تاہم تاحال کسی سرکاری اہلکار کی غفلت ثابت نہیں ہوئی۔
مزید بتایا گیا ہے کہ واقعے کے بعد مقدمہ درج کرکے گھر کے مالک اور اس کے بھائی سمیت پانچ افراد کو حراست میں لے لیا گیا ہے، جبکہ ماہرین کی رائے بھی تحقیقاتی رپورٹ میں شامل کر لی گئی ہے۔
واضح رہے کہ دو روز قبل کاہنہ میں ٹیوشن سینٹر کی چھت گرنے کے نتیجے میں 14 بچے جاں بحق ہو گئے تھے۔
