ایرانی میڈیا نے امریکا اور ایران کے درمیان مبینہ مفاہمتی یادداشت سے متعلق امریکی خبر رساں ادارے بلومبرگ کی رپورٹ پر سوالات اٹھاتے ہوئے دعویٰ کیا ہے کہ شائع کردہ متن درست نہیں اور اس میں متعدد خامیاں موجود ہیں۔
ایرانی میڈیا رپورٹس کے مطابق ایران اور امریکا کی جانب سے تاحال مفاہمتی یادداشت کا باضابطہ اور مکمل متن جاری نہیں کیا گیا، اس لیے مختلف ذرائع سے سامنے آنے والی معلومات کو حتمی یا مستند قرار نہیں دیا جا سکتا۔
رپورٹس میں کہا گیا ہے کہ بلومبرگ کی جانب سے شائع کیے گئے متن میں شامل کئی نکات زمینی حقائق سے مطابقت نہیں رکھتے، جبکہ آبنائے ہرمز سے متعلق بیان کی گئی بعض تفصیلات بھی درست نہیں ہیں۔
ایرانی میڈیا کا مؤقف ہے کہ معاہدے کے بارے میں سامنے آنے والی غیر مصدقہ معلومات عوامی سطح پر غلط فہمیاں پیدا کر سکتی ہیں، اس لیے حتمی مؤقف صرف سرکاری دستاویز کے اجرا کے بعد ہی سامنے آئے گا۔
رپورٹس کے مطابق ایران اور امریکا کے درمیان طے پانے والی مفاہمتی یادداشت کا اصل اور مکمل متن دستخطی عمل مکمل ہونے کے بعد باضابطہ طور پر جاری کیا جائے گا، جس کے بعد معاہدے کی حقیقی شرائط، نکات اور ذمہ داریوں کی واضح تفصیلات سامنے آئیں گی۔
