لاہور میں ہونے والی موسلا دھار بارش نے معمولاتِ زندگی کو متاثر کر دیا، جبکہ طویل دورانیے تک جاری رہنے والی بارش کے باعث شہر کی متعدد سڑکیں زیرِ آب آ گئیں۔
محکمہ موسمیات کے مطابق لاہور میں آج بھی وقفے وقفے سے ہلکی بارش کا سلسلہ جاری رہنے کا امکان ہے۔
پنجاب ڈیزاسٹر مینجمنٹ اتھارٹی (پی ڈی ایم اے) کی رپورٹ کے مطابق گزشتہ 24 گھنٹوں کے دوران صوبے کے مختلف اضلاع میں مون سون بارشوں کے باعث پیش آنے والے حادثات میں 2 افراد جاں بحق جبکہ 44 افراد زخمی ہوئے۔
پی ڈی ایم اے کے مطابق لاہور میں شدید بارش کے دوران بوسیدہ اور مخدوش عمارتوں کے گرنے سمیت مختلف حادثات پیش آئے، جن کے نتیجے میں ایک مرد اور ایک بچہ جاں بحق جبکہ متعدد افراد زخمی ہوئے۔
بارش کے بعد لاہور کے مختلف علاقوں کی صورتحال کی ویڈیوز سوشل میڈیا پر گردش کر رہی ہیں، جن میں سڑکوں پر پانی جمع ہونے اور شہریوں کو درپیش مشکلات کو دکھایا گیا ہے۔
