امریکا اور مشرق وسطیٰ کے 12 ممالک نے آبنائے ہرمز میں بلا تعطل تجارت کے تسلسل کے لیے مشترکہ کوششیں جاری رکھنے پر اتفاق کیا ہے۔
یہ اتفاق رائے بحرین میں امریکی سینٹرل کمانڈ (سینٹ کام) کی قیادت میں ہونے والے علاقائی سیکیورٹی اجلاس میں ہوا، جس میں خطے کی موجودہ سیکیورٹی صورتحال اور دفاعی تعاون کو مزید مضبوط بنانے پر غور کیا گیا۔
اجلاس میں امریکا، سعودی عرب، قطر، عمان، بحرین، مصر، اردن، کویت، لبنان، شام، متحدہ عرب امارات اور یمن کے اعلیٰ فوجی حکام نے شرکت کی۔ شرکاء نے آبنائے ہرمز میں تجارت کے تسلسل اور علاقائی استحکام کے لیے تعاون بڑھانے کے عزم کا اظہار کیا۔
اس موقع پر سینٹ کام کے سربراہ ایڈمرل بریڈ کوپر نے کہا کہ امریکا اپنے علاقائی شراکت داروں کے ساتھ مل کر مشرق وسطیٰ میں فضائی اور میزائل دفاعی نظام کو مزید مؤثر بنا رہا ہے، اور خطے میں امن و استحکام کے لیے مکمل تعاون جاری رکھے گا۔
