وزیراعلیٰ مریم نواز شریف کا اگلے سال مزید 400 الیکٹرو بسیں لانے کا اعلان

پنجاب کی وزیراعلیٰ مریم نواز شریف نے اگلے سال مزید 400 الیکٹرو بسیں لانے کا اعلان کیا ہے، ڈپٹی کمشنرز کو بس اسٹاپ بنانے کی ہدایت کردی۔
تفصیلات کے مطابق وزیراعلیٰ پنجاب مریم نواز شریف نے پاکپتن شریف میں الیکٹرک بس پراجیکٹ کی تقریب سے خطاب کرتے ہوئے صوبے سے متعلق اہم اعلانات کیے، مریم نواز نے دسمبر تک پہلے فیز میں 1100 بسیں چلانے کا بھی اعلان کیا ہے۔
وزیراعلیٰ مریم نواز شریف کی جانب سے ڈپٹی کمشنرز کو الیکٹرو بسوں کےلئے تین ماہ میں بس اسٹاپ بنانے کی ہدایت کی گئی ہے۔
انھوں نے کہا کہ پنجاب کے 38 اضلاع میں ترقی یکساں طور پر نہیں ہوگی تو سمجھا جائے گا کہ پنجاب ترقی یافتہ نہیں ہے، ستھرا پنجاب پروگرام کو خود ترتیب دیکر صوبے بھر میں لانچ کیا ہے۔
مریم نواز نے کہا کہ ہر گاؤں میں 25 کلومیٹر سڑکوں کی تعمیر و مرمت کی جائے گی، پینے کا صاف پانی پہنچانے کے لئے دوردراز علاقوں میں واٹر ٹینکرز بھیجے جائیں گے۔
وزیراعلیٰ پنجاب نے پانی کی قلت کا شکار آبادیوں میں صاف پانی گھر گھر پہچانے کا اعلان کیا جبکہ انھوں نے کسانوں کےلئے ڈی اے پی کھاد پر تاریخی سبسڈی دینے کا بھی اعلان کیا۔
مریم نواز شریف نے کہا کہ نئی سیوریج لائن اور ڈرینج لائن، انڈر واٹراسٹوریج ٹینک بھی بنائے جائیں گے، چھوٹے بڑے شہروں کے لئے بیوٹی فکیشن پلان کی جلدازجلد تکمیل کی جائےگی۔
پنجاب کی وزیراعلیٰ کا کہنا تھا کہ پاکپتن شریف کے شہر کا الیکٹرک بس میں بیٹھ کرڈیڑھ کلو تک سفر کیا، پاکپتن شریف شہر پہلے کی نسبت زیادہ صاف اور کلین نظر آیا۔
مریم نواز شریف نے کہا کہ ستھرا پنجاب پروگرام دنیا کا سب سے بڑا ویسٹ منیجمنٹ پروگرام ہے، 100 بلین روپے کی لاگت سے پورے صوبے کو ستھرا پنجاب پروگرام میں شامل کیا ہے۔
پورے صوبے میں کسی تفریق کے بغیر سب شہروں اور تحصیلوں میں ویسٹ مینجمنٹ مشینری دے رہے ہیں، ستھرا پنجاب پروگرام کے تحت ایک ضلع دوسرے سے ضلع کوئی مشینری نہیں منگوائے گا