واٹر ٹینکر نے ایک اور موٹر سائیکل سوار کو کچل دیا

کراچی(8 نومبر 2025): بلدیہ ٹاؤن لکی چڑھائی پر واٹر ٹینکر نے ایک اور موٹر سائیکل سوار کو کچل دیا ہے اور ٹینکر ڈرائیور فرار ہوگیا۔
تفصیلات کے مطابق کراچی میں بلدیہ ٹاؤن لکی چڑھائی کے قریب تیز رفتار واٹر ٹینکر نے موٹر سائیکل سوار شہری کو روند ڈالا، جس کے بعد ٹینکر ڈرائیور فرار ہوگیا۔
پولیس کے مطابق حادثہ تیز رفتاری کی وجہ سے پیش آیا، واٹر ٹینکر نے لکی چڑھائی کے قریب موٹر سائیکل سوار نوجوان کو ٹکر ماری جس سے وہ موقع پر ہی انتقال کر گیا۔
حکام کا کہنا ہے کہ حادثے میں جاں بحق شہری کی شناخت نہیں ہو سکی، پولیس کے مطابق حادثے کے بعد ٹینکر ڈرائیور موقع سے فرار ہو گیا۔
پولیس نے ٹینکر تحویل میں لے کر تھانے منتقل کر دیا جبکہ جاں بحق شہری کی لاش کو ضابطے کی کارروائی کے لیے سول اسپتال منتقل کر دیا گیا ہے۔
دوسری جانب کراچی کے شارع فیصل کار ساز پر گاڑیاں ٹکرانے کے باعث حادثہ پیش آیا ہے جس کے نتیجے میں 2 افراد زخمی ہوگئے، ڈرگ روڈ سے آتی تیز رفتار کار دوسری جانب سے گزرنے والی گاڑیوں سے ٹکرا گئی، حادثے میں ایک موٹر سائیکل بھی زد میں آئی ہے۔
ریسکیو حکام کا کہنا ہے کہ زخمی افراد کو قریبی اسپتال منتقل کردیا گیا ہے جبکہ حادثے کے باعث 3 گاڑیوں اور ایک موٹر سائیکل کو نقصان پہنچا ہے۔