سندھ ،سید ناصر حسین شاہ سے جماعت اسلامی کراچی کے امیر کی ملاقات

وزیر بلدیات و ہاسنگ و ٹاؤن پلاننگ سندھ سید ناصر حسین شاہ سے جماعت اسلامی کراچی کے امیر منعم ظفر نے وفد کے ہمراہ ملاقات کی جس میں نائب امیر سمیت جماعت اسلامی کے تمام ٹاٶن چیرمین شریک ہوئے۔
چیئرمین ٹاؤن کمیٹی نیو کراچی اور دیگر شکایات پر وزیر بلدیات نے میونسپل کمشنر نیوکراچی ٹاؤن ایاز حمید بلوچ کو فوری طور پر معطل کرنے کی ہدایت کی۔ وزیر بلدیات کی ہدایت پر میونسپل کمشنر نیو کراچی کے معطلی کے احکامات جاری کر دیے گئے۔
وزیر بلدیات نے واضح کیا کہ منتخب بلدیاتی نمائندوں سے تعاون نہ کرنے والے میونسپل کمشنرز کے خلاف سخت کارروائی کی جائے گی۔
وزیر بلدیات نے ٹاٶن چیئرمین مینز کے مساٸل کے حل کے لیے کوآرڈینیشن کمیٹی قاٸم کرنے کی ہدایت کرتے ہوئے کہا کہ ترقیاتی کاموں کے حوالے سے ٹینڈرز اور فنڈز کے سلسلے میں میونسپل کمشنرز ٹاٶن چیئرمین سے لازمی مشاورت کریں۔
ان کا کہنا تھا کہ کوآرڈینیشن کمیٹی میں کے ایم سی، کے ڈی اے ، واٹر کارپوریشن ، سالیڈ ویسٹ منیجمنٹ بورڈ اور کلیک سمیت تمام بلدیاتی اداروں کے نماٸندوں کو شامل کیا جاۓ گا، وفاقی اور صوبائی یوٹیلیٹز اداروں کے درمیان بھی کوآرڈینیشن کمیٹی قائم کی جاۓ گی ، نئے بلدیاتی قوانین میں ترامیم کے حوالے سے جماعت اسلامی سمیت دیگر سیاسی جماعتوں سے بھی مشاورت کی جاۓ گی۔