پاکستانی سابق کپتان بابر اعظم کے پاس ورلڈ ریکارڈ بنانے کا بہترین موقع

پاکستانی ٹیم کے بلے باز اور سابق کپتان بابر اعظم کے پاس جنوبی افریقا کے خلاف ٹی ٹوئنٹی سیریز میں ورلڈ ریکارڈ بنانے کا بہترین موقع ہے۔
بابر اعظم سابق بھارتی کپتان روہت شرما کا ٹی ٹوئنٹی انٹرنیشنل میچز میں سب سے زیادہ رنز بنانے کا ورلڈ ریکارڈ توڑنے کے انتہائی قریب ہیں۔
قومی ٹیم کے سابق کپتان بابر اعظم کو روہت شرما کا ریکارڈ توڑنے کے لیے صرف 9 رنز درکار ہیں۔
روہت شرما 151 اننگز میں 4231 رنز بناکر سر فہرست ہیں جبکہ 31 سالہ بابر اعظم 121 اننگز میں 39.83 کی اوسط سے 4223 رنز بناکر دوسرے نمبر پر موجود ہیں۔
بھارتی ٹیم کے سابق کپتان ویرات کوہلی 117 اننگز میں 4188 رنز کے ساتھ تیسرے نمبر پر ہیں، ان تین کھلاڑیوں کے علاوہ کوئی بلے باز ٹی ٹوئنٹی انٹرنیشنل کرکٹ میں 4000 رنز کا سنگ میل عبور نہیں کرسکا۔
واضح رہے کہ پاکستان اور جنوبی افریقا کے درمیان تین میچز پر مشتمل ٹی ٹوئنٹی سیریز کا پہلا میچ آج پنڈی اسٹیڈیم میں کھیلا جائے گا۔
راولپنڈی میں شیڈول میچ میں بریسٹ کینسر سے آگاہی مہم کے لیے پاکستان ٹیم کی خصوصی پنک جرسی متعارف کروائی گئی ہے۔
سلمان علی نے بابر اعظم کو ٹیم میں شامل کرنے کی وجہ بتادی
پاکستان کرکٹ بورڈ (پی سی بی) کا کہنا ہے کہ پہلے ٹی 20 میچ میں پاکستانی کھلاڑی پنک جرسی پہن کر بریسٹ کینسر آگاہی مہم میں شامل ہوں گے، امپائرز، عملہ اور کمنٹیٹرز بھی پنک ربن پہن کر اس مہم کی حمایت کا اظہار کریں گے۔