پاکستان اور سعودی عرب کے درمیان بڑا دفاعی معاہدہ

وزیراعظم شہباز شریف اور سعودی ولی عہد محمد بن سلمان کے درمیان اسٹریٹیجک باہمی دفاعی معاہدے پر دستخط کیے گئے۔
اعلامیہ کے مطابق معاہدہ دونوں ممالک کی سلامتی کو بڑھانے کیلئے مشترکہ عزم کی عکاسی ہے معاہدہ خطے اور دنیا میں سلامتی و امن کے حصول کیلئے مشترکہ عزم ہے۔
اعلامیہ میں کہا گیا ہے کہ معاہدے کا مقصد کسی بھی جارحیت کیخلاف مشترکہ دفاع و تحفظ مضبوط بنانا ہے کسی ملک کیخلاف جارحیت دونوں ممالک کیخلاف جارحیت تصور ہو گی۔
وزیراعظم شہباز شریف اور سعودی ولی عہد محمد بن سلمان کی اہم ملاقات ہوئی جس میں فیلڈ مارشل عاصم منیر، نائب وزیراعظم اسحاق ڈار ودیگر وزرا بھی شریک تھے۔
ملاقات میں دو طرفہ تعلقات اور دفاعی تعاون پر گفتگو کی گئی۔ سعودی ولی عہد محمد بن سلمان نے پاکستان کو بھرپور تعاون کی یقین دہانی کروائی۔
وزیراعظم شہبازشریف وفد کے ہمراہ سعودی عرب پہنچے ہیں جبکہ اس موقع پر دوست ملک کی جانب سے تاریخی استقبال کیا گیا، شہبازشریف کے طیارے کو سعودی فضائیہ کے ایف 15 لڑاکا طیاروں نے اپنی حفاظت میں لیا اور ایئر بیس تک پروٹوکول دیا گیا۔
وزیراعظم شہبازشریف کا رائل ٹرمینل پر ڈپٹی گورنر ریاض شہزادہ محمد بن عبدالرحمن بن عبدالعزیز نے استقبال کیا ، استقبال کرنے والوں میں دیگر سعودی اعلی شخصیات بھی موجود تھیں، پاکستانی سفیر احمد فاروق اور دیگر سفارتی افسران نے بھی وزیراعظم کا خیر مقدم کیا
ائیرپورٹ لاونج میں وزیراعظم شہبازشریف اور ڈپٹی گورنر شہزادہ محمد بن عبدالرحمن بن عبدالعزیز کے درمیان ملاقات ہوئی جس دوران پاک سعودی تعلقات اور دو طرفہ تعاون پر تبادلہ خیال کیا گیا۔