لاہور (5 نومبر 2025): وفاقی وزیر داخلہ محسن نقوی نے نیشنل ڈیٹا بیس اینڈ رجسٹریشن اتھارٹی (نادرا) کے حکام کو شہریوں کی شناختی دستاویز اور پاسپورٹ کی ڈیلیوری مقررہ مدت میں یقینی بنانے کی ہدایت کر دی۔
وزیر داخلہ نے لاہور میں نادرا سینٹر فہد ٹاؤن اور ریجنل پاسپورٹ آفس ڈیرہ گجراں شالیمار کا اچانک دورہ کیا جہاں انہوں نے شناختی کارڈز و دیگر دستاویز اور پاسپورٹ بنوانے کے عمل کا جائزہ لیا۔
محسن نقوی نے نادرا سینٹر اور پاسپورٹ آفس میں موجود شہریوں سے ملاقات کی اور شہریوں کے مسائل سنے اور حل کیلیے موقع پر ہی احکامات دیے۔
انہوں نے وہیل چیئر پر بزرگ خاتون کی دستاویز بلا تاخیر پراسس کرنے کی ہدایت کرتے ہوئے حکام سے کہا کہ خصوصی افراد کا کام خصوصی پروٹوکول کے ساتھ فی الفور نمٹایا جائے۔
دورے کے دوران محسن نقوی نے شہریوں سے نادرا سینٹر اور پاسپورٹ آفس میں سروسز کے بارے میں پوچھا تو شہریوں نے بتایا کہ پاسپورٹ بنوانے کیلیے زیادہ انتظار نہیں کرنا پڑتا باری جلد آ جاتی ہے۔
وزیر داخلہ نے شناختی کارڈز و دستاویز سے متعلق کام تیزی سے نمٹانے کی ہدایت کرتے ہوئے کہا کہ شہریوں کو اپنی دستاویز کے حصول میں کسی قسم کی مشکل نہیں ہونی چاہیے۔
انہوں نے کہا کہ شناختی دستاویز اور پاسپورٹ کی ڈیلیوری مقررہ مدت میں یقینی بنائی جائے، نادرا سینٹر اور پاسپورٹ آفس آنے والے ہر شہری کا کام مقررہ وقت میں مکمل کیا جائے۔
