لاہور سمیت مختلف شہروں میں فضائی آلودگی کی شدت

لاہور(3 نومبر 2025): صوبہ پنجاب کے دارالخلافہ لاہور سمیت مختلف شہروں میں فضائی آلودگی کی شدت آج بھی زیادہ ریکارڈ کی گئی ہے۔
پنجاب کے مختلف علاقے بدستور فضائی آلودگی کی لپیٹ میں ہیں، ماحولیات کی عالمی ویب سائٹ کے مطابق گجرانوالہ میں پرٹیکیولیٹ میٹرز کی تعداد690 ریکارڈ کی گئی۔
لاہور کا ائیر کوالٹی انڈیکس 471، فیصل آباد میں 306 اور ملتان میں 251 ریکارڈ کیا گیا ہے، دنیا کے الودہ ترین شہروں میں لاہور آج بھی سر فہرست ہے جبکہ کراچی کا چوتھا نمبر ہے۔
کراچی شہر میں آلودگی کا تناسب ایک سو تریسٹھ ریکارڈ کیا گیا ہے جبکہ شہر میں صبح کے اوقات میں ہلکی دھند بھی چھائی رہی۔
محکمہ موسمیات کا کہنا ہے کہ گذشتہ 24 گھنٹوں کے دوران ملک کے بیشتر علاقوں میں موسم خشک جبکہ پہاڑی علاقوں میں سرد رہا، جبکہ پنجاب کے کئی اضلاع میں اسموگ چھائی رہی۔
آج ریکارڈ کیے گئے کم سے کم درجہ حرارت میں لیہہ منفی 3، اسکردو منفی 1 اور زیارت 0 ڈگری سینٹی گریڈ ریکارڈ کیا گیا۔ اسلام آباد اور گردونواح میں موسم خشک جبکہ صبح اور رات کے اوقات میں سرد رہنے کی پیشگوئی کی گئی ہے۔
پنجاب کے اضلاع لاہور، گوجرانوالہ، قصور، شیخوپورہ، اوکاڑہ، فیصل آباد، سیالکوٹ، خانیوال، ساہیوال، رحیم یار خان، بہاولپور اور ملتان میں سموگ یا ہلکی دھند چھائے رہنے کا امکان ہے.