اسٹوڈیو میں خود پر پیٹرول چھڑک کر آگ لگانے والی گلوکارہ نیتو پاڈیل چل بسیں۔
غیر ملکی میڈیا رپورٹ کے مطابق اسٹوڈیو میں خود سوزی کرنے والی نیپالی گلوکارہ دوران علاج اسپتال میں دم توڑ گئی، گلوکارہ نے کچھ دن قبل میوزک اسٹوڈیو میں اپنے آپ پر پیٹرول چھڑک کر آگ لگالی تھی۔
کھٹمنڈو ڈسٹرکٹ پولیس کے مطابق اس نے نیپال کلیفٹ اینڈ برن سینٹر، کیرتی پور اسپتال میں علاج کے دوران آخری سانس لی، نیتو پاڈیل نے ہفتہ کی دوپہر اپنے اوپر پٹرول چھڑک کر خود سوزی کی کوشش کی جس کے بعد اسے فوری طور پر علاج کے لیے اسپتال لے جایا گیا تھا۔
گلوکارہ نیتو پاڈیل کے حوالے سے انکشاف ہوا کہ وہ گزشتہ 7 سال سے پلے بیک سنگر اور میوزک کمپوزر بابل گیری سے رومانوی تعلقات میں تھیں۔
ہفتہ کو پیش آنے والے اس واقعے کے بعد پولیس نے گلوکار بابل گیری کو بھی پوچھ گچھ کے لیے بلایا تھا، پولیس نے بتایا کہ دونوں کے درمیان شادی کے معاملات پر کچھ عرصے سے اختلافات پیدا ہوگئے تھے۔
