اسرائیلی قید سے رہا ہونے والے مشتاق احمد پاکستان کب پہنچیں گے؟ اسحاق ڈار نے بتا دیا

نائب وزیراعظم اسحاق ڈار نے کہا ہے کہ دفتر خارجہ نے سینیٹر مشتاق احمد کی 9 اکتوبر کو پاکستان واپسی کا انتظام کیا ہے۔
میڈیا سے گفتگو کرتے ہوئے اسحاق ڈار نے بتایا کہ ملائیشیا سے اسلام آباد پہنچنے پر اردن کے دارالحکومت امان میں پاکستان کے سفیر کے ذریعے سینیٹر مشتاق سے فون پر بات کی ہے، مشتاق احمد خیریت سے ہیں اور حوصلے بلند ہیں۔
اسحاق ڈار نے کہا کہ صمود فلوٹیلا کا حصہ بننے پر سینیٹر مشتاق کی ہمت اور ثابت قدمی کو سراہاتے ہیں صمود فلوٹیلا میں حصّہ لینے اور غزّہ کیلئے امداد پہنچانےکی ہمت قابل تعریف ہے،
اسحاق ڈار نے بتایا کہ سینیٹر مشتاق نے دفترخارجہ اور امان میں سفارتخانے کی سہولت پر شکریہ ادا کیا۔
واضح رہے کہ مشتاق احمد خان گلوبل صمود فلوٹیلا میں شامل تھے جو غزہ کے فلسطینیوں کی مدد کیلیے اسپین سے روانہ ہوا تھا لیکن اسرائیلی بحریہ نے تمام کارکنوں کو منزل تک پہنچنے سے قبل ہی گرفتار کر لیا تھا۔
مشتاق احمد خان کے آفیشل فیس بک پیج سے جاری ویڈیو پیغام میں انہوں نے کہا کہ میں اپنے گلوبل صمود فلوٹیلا کے 150 ساتھیوں کے ساتھ اردن پہنچ چکا ہوں، 5 دن اسرائیل کے بدنام زمانہ جیل نیگیو میں رہنے کے بعد ہمیں رہائی مل چکی ہے۔
سابق سینیٹر نے بتایا کہ اسرائیلی قید کے دوران ہمارے ہاتھوں میں ہتھکڑیاں ڈال کر پہچھے باندھے گئے، پاؤں میں زنجیرے ڈالی گئیں، آنکھوں پر پٹیاں باندھی گئیں اور ہمارے اپر کتے چھوڑے گئے۔
انہوں نے بتایا کہ ہمیں بدترین قسم کا ٹارچر کیا گیا، قید میں ہم نے اپنے مطالبات کیلیے 3 دن بھوک ہڑتال کی کیونکہ ہمیں کھانا، پانی، ادویات و دیگر چیزوں تک رسائی نہیں دی گئی تھی۔
’ہم رہا ہو چکے ہیں لیکن فلسطین کی آزادی کی جدوجہد جاری رہے گی۔ اس ناکہ بندی کو توڑیں گے، ہم بار بار غزہ جائیں گے۔ مزاحمت جاری رہے گی، پاکستان پہنچ کر سفر اور اسرائیلی قید کی روداد بیان کروں گا