ہتھیار ڈالنے والے ڈاکوؤں کو کیا ملے گا؟ حکومتی پالیسی منظور

سندھ حکومت نے ڈاکوؤں کے ہتھیار ڈالنے کی پالیسی کی منظوری دے دی ہے یہ اقدام امن کی بحالی کے لیے اٹھایا گیا ہے۔
رہنما نیوز کے مطابق سندھ کابینہ نے سکھر اور لاڑکانہ ڈویژن میں امن کی بحالی کے لیے ڈاکوؤں کے ہتھیار ڈالنے کی پالیسی کی منظوری دے دی ہے۔ پالیسی کا مقصد ریاستی رٹ قائم کرنا اور کچے کے علاقوں میں ترقی کا فروغ ہے۔
سندھ حکومت کی جانب سے ہتھیار ڈالنے والے ڈاکوؤں کے خاندانوں کو معاشی تحفظ فراہم کیا جائے گا۔ اس کے ساتھ ان خاندانوں کو تعلیم، صحت، تحفظ اور معاشرے کا مفید شہری بنانے کے لیے تربیت دی جائے گی۔
ترجمان نے بتایا کہ کچے میں کامیاب آپریشنز اور مقامی مذاکرات کے بعد متعدد ڈاکو ہتھیار ڈالنے پر آمادہ ہیں۔ قانون کے تحت ہتھیار ڈالنے والوں کیلیے مکمل میکنزم بنایا گیا ہے۔
اس مکینزم کے تحت کچے کے علاقوں میں اسکول، صحت، ویٹرنری اور ترقیاتی منصوبے بھی بحال کیے جائیں گے۔
وزیراعلیٰ سندھ نے محکمہ داخلہ کو نگرانی اور شفافیت کا عمل موثر بنانے، ہتھیار ڈالنے کے عمل کو فروغ دینے کے لیے آگہی مہم تیز کرنے کی ہدایات کی ہیں۔