اسلام آباد: آئی ایم ایف کی شرط پر عملدرآمد فیڈرل بورڈ آف ریونیو کے اختیارات میں تبدیلی کردی گئی ، جس کے تحت ایف بی آر اب صرف ٹیکس جمع کرے گا، ٹیکس پالیسی نہیں بنائے گا۔
تفصیلات کے مطابق آئی ایم ایف کی شرط پر عملدرآمد کرتے ہوئے حکومت نے وزارتِ خزانہ میں ٹیکس پالیسی آفس کو فعال کر دیا ہے۔
جس کے بعد فیڈرل بورڈ آف ریونیو (ایف بی آر) اب صرف ٹیکس جمع کرنے کا ادارہ ہوگا اور ٹیکس پالیسی نہیں بنائے گا، ٹیکس پالیسی سازی کا اختیار نئے آفس کے پاس ہوگا۔
ذرائع نے بتایا کہ ڈاکٹر نجیب احمد میمن کو دو سال کے لیے ہیڈ آف ٹیکس پالیسی آفس تعینات کیا گیا ہے، جبکہ دیگر اہم تقرریوں کا مرحلہ بھی مکمل کر لیا گیا ہے۔
نعیم حسن کو ڈائریکٹر بزنس ٹیکسیشن، فدا محمد کو ڈائریکٹر انٹرنیشنل ٹیکسیشن، منیر احمد کو ڈائریکٹر ڈائریکٹ/ان ڈائریکٹ ٹیکسیشن اور اعجاز حسین کو ڈائریکٹر پرسنل ٹیکسیشن تعینات کیا گیا ہے، تمام افسران کو اسپیشل پروفیشنل پے اسکیل پر تعینات کیا گیا ہے۔
ذرائع کے مطابق ٹیکس پالیسی آفس آئندہ ہفتے سے ورکنگ شروع کرے گا اور رولز و ریگولیشنز کی تیاری مکمل کی جائے گی۔
