ای چالان کے نفاذ کے ساتھ ہی ٹریفک پولیس سڑکوں سے غائب

کراچی میں ای چالان سسٹم کے نفاذ کے ساتھ ہی ٹریفک پولیس اہلکار سڑکوں سے غائب ہو گئے ہیں، جبکہ ہزاروں چوراہوں اور سڑکوں پر ٹریفک سگنل نہ ہونے کی وجہ سے ٹریفک کا نظام درہم برہم ہے۔ شہریوں کی جانب سے یہ سوال اٹھایا جا رہا ہے کہ جب پولیس اہلکاروں کے پاس چالان کا اختیار تھا تو وہ ہر وقت سڑکوں پر متحرک نظر آتے تھے، مگر اب شاذ و نادر ہی نظر آتے ہیں۔ پولیس ذرائع کے مطابق شہر میں 5 ہزار اہلکار تعینات ہیں، تاہم سڑکوں پر ان کی کارکردگی پر نظر رکھنے کا کوئی مؤثر میکانزم موجود نہیں ہے، جس کے پیش نظر ماہرین کراچی جیسے میگا شہر میں ٹریفک منیجمنٹ کے لیے بہتر منصوبہ بندی پر زور دے رہے ہیں۔