ڈیموکریٹ امیدوارنے پھر سے صدارتی انتخاب لڑنے کا اشارہ دے دیا

گزشتہ سال امریکی صدارتی انتخابات میں شکست کھانے والی ڈیموکریٹ امیدوار کملا ہیرس نے پھر صدارتی انتخاب لڑنے کا اشارہ دے دیا۔
کملا ہیرس نے وائٹ ہاؤس کے لیے دوبارہ انتخاب لڑنے کے امکان کو مسترد نہیں کیا، بی بی سی کو ہفتے کے روز دیے گئے انٹرویو میں کملا نے کہا کہ انھیں توقع ہے کہ آنے والے برسوں میں ایک خاتون صدر بنے گی، اور یہ ’’ممکن ہے‘‘ کہ وہ خود ہوں۔
انھوں نے کہا میں نے ابھی اپنا کام مکمل نہیں کیا، دوبارہ صدارتی الیکشن لڑ سکتی ہوں، امید ہے ایک دن امریکا کی صدر بن جاؤں گی، مجھے یقین ہے مستقبل میں وائٹ ہاؤس میں ایک خاتون صدر ہوگی۔
سابق نائب امریکی صدر نے کہا کہ انھوں نے ابھی تک یہ فیصلہ نہیں کیا کہ وہ 2028 کے صدارتی انتخابات میں حصہ لیں گی یا نہیں۔ تاہم، انھوں نے اس خیال کو مسترد کر دیا کہ ان کے جیتنے کے امکانات کم ہوں گے۔ ان کا کہنا تھا ’’میں نے اپنی پوری زندگی خدمت کے جذبے کے ساتھ گزاری ہے، یہ میرے وجود کا حصہ ہے، اور خدمت کے بہت سے طریقے ہیں، میں نے کبھی عوامی رائے کے جائزوں (پولز) پر کان نہیں دھرا۔‘‘
’پاکستان نے چند دنوں میں ہی افغانستان سے جنگ کا معاملہ حل کرلیا‘ ٹرمپ کی پاکستانی قیادت کی تعریف
کملا ہیرس نے صدر ٹرمپ کو آمر قرار دیتے ہوئے کہا میں نے صدارتی مہم کے دوران ٹرمپ کے بارے میں جن باتوں سے خبردار کیا تھا وہ درست ثابت ہوئی ہیں۔
کملا ہیرس نے حال ہی میں اپنی کتاب ’’107 ڈیز‘‘ کی ستمبر میں اشاعت کے بعد متعدد انٹرویوز دیے ہیں۔ یہ کتاب اس تجربے پر مبنی ہے جب انھوں نے اُس وقت کے صدر جو بائیڈن کے انتخابی دوڑ سے دست بردار ہونے کے بعد 2024 میں ڈیموکریٹک صدارتی امیدوار کے طور پر ان کی جگہ لی، اور آخرکار وہ ریپبلکن صدر ڈونلڈ ٹرمپ سے الیکشن ہار گئیں۔
گزشتہ ہفتے ایسوسی ایٹڈ پریس کو دیے گئے ایک انٹرویو میں 60 سالہ کملا ہیرس نے واضح کیا کہ 2028 میں دوبارہ انتخاب لڑنے کا امکان اب بھی موجود ہے۔ انھوں نے کہا کہ وہ خود کو پارٹی کی قیادت میں دیکھتی ہیں، خاص طور پر ٹرمپ کے .خلاف مزاحمت اور 2026 کے وسط مدتی انتخابات کی تیاری میں