ممبئی (11 نومبر 2025): بالی وڈ کے لیجنڈری اداکار دھرمیندر کی موت کی خبروں پر ان کی اہلیہ و معروف اداکارہ ہیما مالنی نے خاموشی توڑ دی۔
انڈین میڈیا کی جانب سے دعویٰ کیا جا رہا ہے کہ 89 سالہ اداکار دھرمیندر کو گزشتہ روز بریچ کینڈی اسپتال میں داخل کروایا گیا تھا لیکن وہ آج صبح چل بسے۔
تاہم ہیما مالنی نے ان خبروں کی سختی سے نہ صرف تردید کی بلکہ غلط خبریں پھیلانے والے انڈین میڈیا کو بھی تنقید کا نشانہ بنایا۔
ہیما مالنی نے سوشل میڈیا پلیٹ فارم ایکس پر جاری اپنے بیان میں کہا کہ یہ جو کچھ ہو رہا ہے وہ ناقابلِ معافی ہے، ذمہ دار نیوز چینلز ایسے شخص کے بارے میں جھوٹی خبریں کیسے پھیلا سکتے ہیں جو زیرِ علاج ہے اور صحت یاب ہو رہا ہے؟
اداکارہ نے مزید کہا کہ یہ انتہائی بے عزتی اور غیر ذمہ دارانہ عمل ہے، برائے مہربانی ہمارا احترام کریں اور فیملی کی رازداری کا خیال رکھیں۔
لیجنڈری اداکار نے 11 نومبر کو ممبئی کے بریچ کینڈی اسپتال میں آخری سانسیں لیں، ان کی ٹیم نے اس افسوسناک خبر کی تصدیق بھی کی۔
دھرمیندر کو گزشتہ ہفتے 31 اکتوبر کو بھی سانس کی تکلیف کے باعث معمول کے طبی معائنے کیلیے اسپتال میں داخل کیا گیا تھا جبکہ رواں سال اپریل میں ان کی آنکھ کی سرجری بھی ہوئی تھی۔
بالی وڈ کے ’ہی مین‘ کے طور پر مشہور دھرمیندر کا فلمی کیریئر 6 دہائیوں پر محیط ہے جو بھارتی سینما کی ایک شان دار وراثت کی عکاسی کرتا ہے۔
فلم ’شعل‘“ کے اس اداکار کو مداح آئندہ آنے والی فلم ’اکیس ‘ میں آخری بار دیکھ سکیں گے جو 25 دسمبر کو ریلیز ہوگی۔ ان کے 6 بچے ہیں جن میں سنی دیول، بوبی دیول، ایشا دیول، آہنا دیول، اجیتا اور وجیتا شامل ہیں۔
