بحرین کے شاہی خاندان کے رکن شیخ سلمان بن ابراہیم الخلیفہ پاکستان آمد

اسلام آباد: بحرین کے شاہی خاندان کے رکن شیخ سلمان بن ابراہیم الخلیفہ پاکستان پہنچ گئے۔
تفصیلات کے مطابق بحرین کے شاہی خاندان کے رکن اور فیفا کے سینئر نائب صدر شیخ سلمان بن ابراہیم الخلیفہ تین روزہ سرکاری دورے پر پاکستان پہنچ گئے۔
وزارتِ بین الصوبائی رابطہ کے سینئر حکام نے اسلام آباد ایئرپورٹ پر معزز مہمان کا پرتپاک استقبال کیا۔
صدر پاکستان فٹبال فیڈریشن محسن گیلانی نے بھی شیخ سلمان بن ابراہیم الخلیفہ کا خیرمقدم کیا، اس موقع پر اے ایف سی کے سیکرٹری جنرل سونم جگمی اور دیگر عہدیداران بھی موجود تھے۔
اعلامیے میں کہا گیا ہے کہ وزیراعظم کی ہدایت پر شیخ سلمان بن ابراہیم الخلیفہ کو ’’اسٹیٹ گیسٹ‘‘ کا درجہ دیا گیا ہے، اپنے دورے کے دوران وہ پاکستان کی اعلیٰ سول اور عسکری قیادت سے ملاقاتیں کریں گے۔
شیخ سلمان بن ابراہیم الخلیفہ کے دورے میں فٹبال انفراسٹرکچر ڈویلپمنٹ، نوجوانوں کے لیے کھیلوں کے فروغ اور پاکستان میں اسپورٹس ڈویلپمنٹ پروجیکٹس پر تعاون کے امکانات پر تبادلہ خیال کیا جائے گا۔ یہ دورہ پاکستان میں کھیلوں خصوصاً فٹبال کے فروغ کے لیے ایک اہم سنگِ میل قرار دیا جا رہا ہے۔