امریکی صدر ڈونلڈ ٹرمپ کا غیر قانونی تارکینِ وطن کے خلاف کارروائیوں کا بھرپور دفاع

واشنگٹن (03 نومبر 2025): امریکی صدر ڈونلڈ ٹرمپ نے کہا ہے کہ غیر قانونی تارکین وطن کے خلاف چھاپوں سے لبرل ججز نے روک رکھا ہے۔
امریکی صدر ڈونلڈ ٹرمپ نے غیر قانونی تارکینِ وطن کے خلاف امیگریشن اینڈ کسٹمز انفورسمنٹ (آئی سی ای) کی کارروائیوں کا بھرپور دفاع کرتے ہوئے کہا ہے کہ یہ چھاپے ’’ابھی اتنے نہیں ہوئے جتنے ہونے چاہئیں۔‘‘
سی بی ایس کے معروف پروگرام ’’60 منٹس‘‘ میں اینکر نے ان سے سوال کیا کہ کیا امریکی شہروں میں آئی سی ای کے چھاپے حد سے بڑھ گئے ہیں، جس پر ٹرمپ نے کہا، ’’نہیں، میرا خیال ہے کہ یہ ابھی کافی نہیں ہوئے، امیگریشن اینڈ کسٹمز انفورسمنٹ کی کارروائیاں اتنی دور تک نہیں گئیں، کیوں کہ ہمیں لبرل ججوں نے روکے رکھا ہے، یہ وہی جج ہیں جنھیں جو بائیڈن اور اوباما نے تعینات کیا تھا۔‘‘
اینکر نے مزید پوچھا کہ کیا وہ ان سخت کارروائیوں کی حمایت کرتے ہیں، جن میں ایک نوجوان ماں کو زمین پر گرایا گیا اور شکاگو کے رہائشی علاقے میں آنسو گیس استعمال کی گئی؟ اس پر صدر نے جواب دیا، ’’جی ہاں، کیوں کہ آپ کو ان لوگوں کو نکالنا ہی ہوگا۔‘‘
ٹرمپ کا کہنا تھا کہ امریکا میں آئے بہت سے لوگ جرائم کی بنیاد پر اپنے ملکوں سے نکالے گئے، پالیسی یہ ہے کہ اگر آپ غیر قانونی طور پر داخل ہوئے ہیں تو آپ کو جانا ہوگا۔