واشنگٹن : امریکی میگزین “فارن افیئرز” نے پاکستان کے مقابلے بھارت پر انحصار کی امریکی پالیسی ناکام قرار دے دی اور کہا اب امریکاکو پاکستان پر اعتماد کر کے دیکھنا ہوگا۔
تفصیلات کے مطابق امریکی جریدے فارن افیئرز کی جانب سے رپورٹ میں کہا گیا ہے کہ پاکستان کے مقابلے میں بھارت پر انحصار کی امریکی پالیسی کو ناکام قرار رہی۔
رپورٹ میں کہنا تھا کہ بھارت کبھی بھی امریکا کا قابلِ بھروسہ شراکت دار نہیں رہا اور نہ ہی وہ واشنگٹن کی توقعات پر پورا اُترا، جبکہ پاکستان زیادہ قابلِ اعتماد شراکت دار ثابت ہوا ہے، امریکا کو اب پاکستان پر اعتماد کرکے دیکھنا ہوگا۔
امریکی جریدے نے صدر ٹرمپ کے اس اعتراف کو بھی اجاگر کیا کہ پاکستان نے دہشت گردی کے خلاف نمایاں اقدامات کیے اور بھارت کے ساتھ کشیدگی کم کرنے کی کوششوں میں اہم کردار ادا کیا۔
رپورٹ میں مزید کہا گیا کہ پاکستان اور امریکا کے تجارتی و توانائی معاہدے دونوں ممالک کے لیے فائدہ مند رہے ہیں، ریکوڈک سمیت پاکستانی وسائل میں امریکی سرمایہ کاری خطے میں استحکام پیدا کر سکتی ہے۔
فارن افیئرز کے مطابق بھارت پر مرکوز امریکی پالیسی خطے میں دراڑیں ڈالنے اور جنگ کے خطرات بڑھانے کا سبب بنے گی، پاکستان کی قومی سلامتی پالیسی میں امریکا اور چین کے ساتھ متوازن تعلقات پر زور دیا گیا ہے، جبکہ ماضی میں بھی پاکستان امریکا اور چین کو قریب لانے کا پل رہا ہے۔
جریدے نے واضح کیا کہ بھارت پر انحصار سے امریکا کا خطے میں اثر و رسوخ کمزور ہوگا، جبکہ پاکستان کے ساتھ تعلقات واشنگٹن کے لیے زیادہ سودمند ثابت ہو سکتے ہیں۔
