وفاقی وزیر اطلاعات و نشریات عطا اللہ تارڑ نے کہا ہے کہ پاکستان نے دہشتگردی کے خلاف جنگ میں بھاری معاشی نقصان اٹھانے کے ساتھ بے شمار قربانیاں دی ہیں اور اس جنگ کے ذریعے دنیا کو محفوظ بنانے میں اہم کردار ادا کیا ہے۔
اسلام آباد میں خیبرپختونخوا کے حوالے سے منعقدہ سیمینار سے خطاب کرتے ہوئے عطا اللہ تارڑ کا کہنا تھا کہ دہشتگردی اور انتہا پسندی پاکستان کو درپیش اہم چیلنجز ہیں۔ ان کے مطابق دہشتگردی کے خلاف جنگ میں پاکستان کو 100 ارب ڈالر کا معاشی نقصان برداشت کرنا پڑا ہے۔
وفاقی وزیر نے کہا کہ دہشتگردی کے خلاف جنگ میں پاکستان نے سب سے زیادہ قربانیاں دی ہیں۔ انہوں نے افغان مہاجرین کی میزبانی کا ذکر کرتے ہوئے کہا کہ پاکستان نے تقریباً 10 سال تک 40 لاکھ افغان مہاجرین کی میزبانی کی، جو پاکستانی عوام کی مہمان نوازی اور محبت کا ثبوت ہے۔
عطا اللہ تارڑ نے افغان حکومت پر تنقید کرتے ہوئے کہا کہ افغان رجیم ظلم و بربریت پر یقین رکھتی ہے۔ انہوں نے اس بات پر زور دیا کہ خطے کے امن اور استحکام کے لیے ایک پُرامن اور مستحکم افغانستان ضروری ہے۔
