صدر اسلامی جمہوریہ پاکستان آصف علی زرداری نے آزادی کی 78ویں سالگرہ کے موقع پر پیغام میں کہا کہ آج ہم اپنے عظیم قائد قائد اعظم محمد علی جناحؒ اور تحریک پاکستان کے تمام کارکنان کو خراجِ عقیدت پیش کرتے ہیں جن کی کاوشوں اور قربانیوں نے اس خواب کو حقیقت بنایا، اس سال ہم یوم آزادی بڑے افتخار اور ایک تازہ امید کے ساتھ منا رہے ہیں۔
پاکستان اور بیرون ملک مقیم پاکستانیوں کو دل کی گہرائیوں سے یوم آزادی مبارک پیش کرتاہوں، یہ دن ہمیں اس جرات،اتحاد اور قربانیوں کی یاد دلاتا ہے۔
حال ہی میں ہماری قوم نے بیرونی جارحیت کے جواب میں اپنی طاقت، عزم اور اتحاد کا مظاہرہ کیا، معرکہ حق اور آپریشن بنیان مرصوص میں ہماری فتح ہماری تاریخ کا ایک سنہری باب ہے۔
یہ فتح ہمارے عوام کے لیے نئے اعتماد کا ذریعہ بنی ہے، اس نے قوم کے حوصلے بلند کیے، اداروں پر اعتماد مزید مضبوط کیا اور پاکستان کے عالمی مقام کو مزید مستحکم کیا۔ یہ کامیابی غیر متزلزل قومی عزم، بے مثال پیشہ ورانہ مہارت اور پوری قوم کے اتحاد کا ثبوت ہے۔
