تاجکستان میں گلیشئرز کے تحفظ کیلئے بین الاقوامی کانفرنس سے خطاب میں وزیراعظم شہبازشریف نے کہا کہ پاکستان سمیت دنیا کو ماحولیاتی تبدیلی کے چیلنج کا سامناہے، گلیشیئرز کا تحفظ ہمارے لیے بہت اہم ہے، ماحولیاتی تبدیلی کے اثرات گلیشیئرز پر بھی ہورہے ہیں۔
وزیراعظم نے کہا کہ پاکستان میں 13ہزار گلیشیئرز ہیں، پاکستان کےپانی کانصف حصہ گلیشیئرز پر مشتمل ہے، ماحولیاتی تبدیلی کی وجہ سے گلیشیئرز تیزی سے پگھل رہے ہیں، سیلاب سے فصلوں اور انفراسٹرکچر کو شدید نقصان پہنچا، ماحولیاتی تبدیلیوں سے پاکستان کو سیلاب،طوفانی بارشوں کا سامنا کرنا پڑا۔
شہبازشریف نے کہا کہ پاکستان کا فضا میں زہریلی گیسز اخراج کا نصف فیصد سے بھی کم حصہ ہے، ماحولیاتی تبدیلیوں سے نمٹنے کیلئے مشترکہ اقدامات کی ضرورت ہے، ترقی یافتہ ملک ترقی پذیر ممالک میں ارلی وارننگ سسٹم میں سرمایہ کاری بڑھائیں، ترقی یافتہ ملک ماحولیاتی تبدیلی سے نمٹنے کیلئے ذمہ داریاں پوری کریں۔
