اسلام آباد: وزارت اطلاعات و نشریات نے قومی پیغام امن کمیٹی کے قیام کا نوٹیفکیشن جاری کر دیا، یہ کمیٹی قومی کمیٹی برائے تشکیل بیانیہ کی ذیلی کمیٹی ہوگی۔
تفصیلات کے مطابق نوٹیفکیشن میں کہا گیا ہے کہ قومی پیغام امن کمیٹی انتہا پسندی، دہشت گردی پر متفقہ بیانیہ مرتب کریگی، فرقہ واریت، نفرت انگیز تقاریر کیخلاف بھی قومی سطح پر متفقہ بیانیہ مرتب کیا جائیگا۔
کمیٹی کی سربراہی وفاقی وزیر اطلاعات و نشریات کریں گے، قومی پیغام امن کمیٹی میں مختلف مکاتب فکر کے جید علمائے کرام کو شامل کیا گیا ہے، اس کے علاوہ مشائخ، اقلیتوں کے نمائندگان اور متعلقہ وزارتوں کے اعلیٰ حکام بھی کمیٹی میں شامل ہیں۔
نوٹیفکیشن کے مطابق کمیٹی کے اراکین میں سینیٹر حافظ عبد الکریم، مفتی عبد الرحیم، علامہ عارف حسین واحدی، پیر نقیب الرحمان، علامہ محمد حسین اکبر، ڈاکٹر محمد راغب حسین نعیمی شامل ہیں۔
مولانا طاہر محمود اشرفی، مولانا طیب پنج پیری، علامہ ضیا اللہ شاہ بخاری بھی کمیٹی کے اراکین میں شامل ہیں، کمیٹی میں اقلیتوں کی نمائندگی کیلئے بشپ آزاد مارشل، راجیش کمار ہرداسانی اور سردار رمیش سنگھ اروڑہ کو شامل کیا گیا ہے۔
نوٹیفکیشن کے مطابق کمیٹی کے اراکین میں صوبائی و علاقائی پیغام امن کمیٹیوں کے کوآرڈینیٹرز، منظور شدہ مدارس بورڈز کے نمائندگان کو بھی شامل کیا گیا ہے، اس کے علاوہ وزارت داخلہ اور وزارت مذہبی امورکے ایڈیشنل سیکریٹریز بھی قومی پیغام امن کمیٹی میں شامل ہیں۔
ڈائریکٹر جنرل مذہبی تعلیمات بھی قومی پیغام امن کمیٹی میں شامل ہیں جبکہ وزارت اطلاعات و نشریات کے ڈائریکٹرجنرل انٹرنل پبلسٹی ونگ کمیٹی کے سیکریٹری کے طور پر خدمات انجام دینگے۔
جاری کردہ نوٹیفکیشن کے مطابق کمیٹی اپنی پہلی میٹنگ میں تفصیلی ضوابط کار (ٹی او آرز) مرتب کرے گی، ٹی او آرز کو نیشنل کمیٹی آن نیریٹو بلڈنگ کی منظوری کے لیے پیش کیا جائے گا۔
