نائب وزیراعظم و وزیر خارجہ اسحاق ڈار 25 اور 26 اگست کو سعودی عرب کا دو روزہ سرکاری دورہ کریں گے۔ ترجمان دفتر خارجہ شفقت علی خان کے مطابق اسحاق ڈار جدہ میں او آئی سی وزرائے خارجہ کونسل کے ہنگامی اجلاس میں شرکت کریں گے۔
ترجمان نے بتایا کہ اسحاق ڈار ڈھاکا کے سرکاری دورے کی تکمیل کے بعد براہ راست جدہ روانہ ہوں گے۔ اجلاس میں او آئی سی رکن ممالک کے وزرائے خارجہ اور اعلیٰ حکام شریک ہوں گے، جہاں فلسطین کی صورتحال، اسرائیلی فوجی جارحیت، غزہ پر قبضے اور فلسطینی عوام کے حقوق کی خلاف ورزیوں پر تفصیلی غور کیا جائے گا۔
بیان کے مطابق پاکستان نے ہمیشہ فلسطینی عوام کے حق میں آواز بلند کی ہے اور عالمی فورمز پر اس مسئلے کو اجاگر کیا ہے۔ اجلاس کے دوران نائب وزیراعظم اسحاق ڈار پاکستان کے اصولی مؤقف کو دہراتے ہوئے فلسطین کے حق میں غیر متزلزل حمایت کا اعادہ کریں گے۔
ترجمان دفتر خارجہ کے مطابق اسحاق ڈار فلسطینی عوام کی جبری بے دخلی کی شدید مخالفت کریں گے، اسرائیل کے تمام مقبوضہ فلسطینی علاقوں سے مکمل انخلا کا مطالبہ کریں گے اور انسانی ہمدردی کی بنیاد پر امداد کی بلا تعطل فراہمی پر زور دیں گے۔
ترجمان نے مزید کہا کہ جدہ میں او آئی سی رکن ممالک کے وزرائے خارجہ سے اسحاق ڈار کی دوطرفہ ملاقاتیں بھی متوقع ہیں۔
