امیر جماعت اسلامی پاکستان حافظ نعیم الرحمان نے حکومت کی معاشی پالیسیوں اور مجوزہ بجٹ کو شدید تنقید کا نشانہ بناتے ہوئے کہا ہے کہ عوام کو ریلیف دینے کے بجائے ان پر مزید بوجھ ڈالا جا رہا ہے۔ پریس کانفرنس سے خطاب کرتے ہوئے انہوں نے دعویٰ کیا کہ پیپلز پارٹی کے “سسٹم” کو گلگت بلتستان تک وسعت دے دی گئی ہے، جبکہ بنیادی مسائل کے حل کے لیے مؤثر اقدامات نہیں کیے گئے۔
حافظ نعیم الرحمان نے کہا کہ لیوی سمیت مختلف ٹیکسز کے ذریعے عوام پر اضافی مالی بوجھ عائد کیا جا رہا ہے، جبکہ شوگر مافیا کو حکومتی سرپرستی حاصل ہے۔ ان کے بقول پیٹرول، بجلی اور گیس کی قیمتوں میں کمی کے بغیر معیشت میں بہتری ممکن نہیں، اس لیے حکومت کو فوری طور پر عوامی ریلیف فراہم کرنا چاہیے۔
انہوں نے خبردار کیا کہ اگر بجٹ میں عوامی مفاد کے اقدامات شامل نہ کیے گئے تو جماعت اسلامی احتجاج اور ہڑتال کی کال دینے پر غور کرے گی۔ انہوں نے ایف بی آر میں مبینہ کرپشن، کراچی میں پانی کے بحران، کے فور منصوبے میں تاخیر اور بحری قذاقوں کے ہاتھوں یرغمال پاکستانی شہریوں کی بازیابی کے معاملے پر بھی حکومت کو تنقید کا نشانہ بنایا اور فوری اقدامات کا مطالبہ کیا۔
