پاکستانی اداکارہ مریم نفیس نے حالیہ دنوں میں ملک میں خواتین کے خلاف پیش آنے والے افسوسناک واقعات پر شدید ردعمل کا اظہار کیا ہے۔
اداکارہ نے اپنی انسٹاگرام اسٹوری پر ایک سوشل میڈیا پوسٹ شیئر کی، جس میں تجویز دی گئی تھی کہ جانوروں پر مختلف سائنسی اور طبی تجربات کرنے کے بجائے جنسی زیادتی کے مرتکب افراد پر ایسے ٹیسٹ کیے جائیں۔
شیئر کی گئی پوسٹ میں مزید سوال اٹھایا گیا تھا کہ اگر ایسے تجربات مجرموں پر کیے جائیں تو کیا وہ بھی انکار یا احتجاج کریں گے۔
مریم نفیس کی جانب سے اس پوسٹ کے شیئر کیے جانے کے بعد سوشل میڈیا پر اس پر خاصی بحث دیکھنے میں آئی۔ مختلف سوشل میڈیا پیجز نے اداکارہ کی اسٹوری کو دوبارہ شیئر کیا، جہاں متعدد صارفین نے ان کے مؤقف کی حمایت کی۔
ایک صارف نے تبصرہ کرتے ہوئے لکھا کہ جنسی جرائم میں ملوث افراد کو طبی تحقیق کے لیے استعمال کیا جانا چاہیے، جبکہ دیگر صارفین نے بھی اداکارہ کے خیالات کی تائید کرتے ہوئے اسے ایک مؤثر تجویز قرار دیا۔
مریم نفیس ماضی میں بھی سماجی مسائل، خواتین کے حقوق اور انسانی حقوق سے متعلق موضوعات پر کھل کر اظہارِ خیال کرتی رہی ہیں۔
