اسلام آباد: قومی اسمبلی کے اسپیکر ایاز صادق نے پاکستان تحریک انصاف کے رکن اقبال آفریدی کو پورے بجٹ سیشن کے دوران ایوان کی کارروائی میں شرکت سے معطل کر دیا۔
اسپیکر نے سارجنٹ ایٹ آرمز کو ہدایت جاری کرتے ہوئے اقبال آفریدی کو ایوان سے باہر لے جانے کا حکم دیا۔ ایاز صادق کا کہنا تھا کہ رکن اسمبلی نے اسپیکر کے عملے کے ساتھ نامناسب رویہ اختیار کیا، ڈی جی میڈیا سے بدتمیزی کی اور پولیس اہلکاروں کے ساتھ بھی غیر مناسب برتاؤ کیا، جو کسی صورت قابل قبول نہیں۔
بعد ازاں رکن قومی اسمبلی فرح ناز اکبر نے اقبال آفریدی کی معطلی کی تحریک ایوان میں پیش کی، جسے کثرتِ رائے سے منظور کر لیا گیا۔
اسپیکر قومی اسمبلی نے اعلان کیا کہ اقبال آفریدی بجٹ سیشن کے اختتام تک ایوان کی کارروائی میں حصہ نہیں لے سکیں گے، جبکہ اس دوران انہیں کسی قسم کے الاؤنسز بھی ادا نہیں کیے جائیں گے۔
