ایرانی سپریم لیڈر مجتبیٰ خامنہ ای نے کہا ہے کہ ایران کے مخالفین میدانِ جنگ میں اپنے مقاصد حاصل کرنے میں ناکام رہے ہیں اور اب وہ عوام کو نشانہ بنانے کے ساتھ ساتھ ملک کے اندر اختلافات اور تقسیم پیدا کرنے کی کوشش کر رہے ہیں۔
اپنے ایک تحریری پیغام میں انہوں نے کہا کہ عوام میں مایوسی اور ناامیدی پھیلانے والا ہر اقدام دراصل دشمن کے مفادات کو تقویت دیتا ہے۔ ان کا کہنا تھا کہ عالمی طاقتیں ایران کی ترقی اور پیش رفت کا راستہ نہیں روک سکتیں۔
مجتبیٰ خامنہ ای نے دعویٰ کیا کہ ایران نے امریکی خفیہ ادارے سی آئی اے کی مختلف سازشوں کو ناکام بنایا ہے، جس کے بعد مخالف قوتیں اب ہائبرڈ جنگ کی حکمت عملی پر زیادہ توجہ دے رہی ہیں۔
انہوں نے مزید کہا کہ اسرائیل کے حوالے سے ایران کے مؤقف میں کوئی تبدیلی نہیں آئی اور نہ ہی آئے گی۔ ان کے بقول امریکا نے خطے میں ایک فوجی اڈہ قائم کر رکھا ہے جسے اسرائیل کہا جاتا ہے۔
